काठमाडौं । क्यापिटल मिडिया ग्रुप अन्तर्गत सिएमजी मिडिया नेपाल प्रा.लिद्वारा सञ्चालित अनलाइन सञ्चार माध्यम क्यापिटल दैनिकको प्रधान सम्पादकमा पत्रकार विमल थापा नियुक्त भएका छन् ।
२ दशक बढी रेडियो, टेलिभिजन र छापा पत्रकारिताको अनुभव सँगालेका थापालाई कम्पनीले विहीबार औपचारिक रुपमा प्रधान सम्पादक नियुक्त गरेको हो ।
सम्पादक थापालाई जिम्मेवारी हस्तान्तरण गर्दै कम्पनीका कार्यकारी अध्यक्ष सुशील राउतले व्यवसायिक पत्रकारितामा विभिन्न माध्यममा सक्रिय थापाको सम्पादकीय नेतृत्वले क्यापिटल दैनिकले अझै उचाइ कायम गर्ने विश्वास व्यक्त गरे ।
उनले नेपालको संविधानले निर्दिष्ट गरेको संघीय लोकतान्त्रिक गणतन्त्र नेपालको विकास र समृद्धिका निम्ति आम नागरिकलाई सुसूचित गर्दै निष्पक्ष, निर्भिक, तथ्यपरक र विश्वसनीय समाचार, सूचना तथा सन्देशहरु प्रवाह गर्न क्यापिटल मिडिया ग्रुप प्रतिबद्ध रहेको बताए ।
उनले भने, ‘नेपालको इतिहासमा विगत १७ बर्षदेखिको विशेषतः रेडियोका माध्यमबाट आम श्रोताका बीचमा आफ्नो छुट्टै परिचय स्थापित गर्न सक्षम क्यापिटल मिडिया ग्रुप अन्तर्गत सञ्चालित क्यापिटल दैनिकले आम पाठक र दर्शकहरुका निम्ति रुची र चासोका बिषयबस्तुहरु पस्कने कोसिस गर्नेछ । त्यसका निम्ति थापाको सम्पादकीय नेतृत्वले प्रभावकारी भूमिका खेल्नेमा म विश्वस्त छु ।’
कार्यक्रममा नवनियुक्त प्रधान सम्पादक विमल थापाले लामो समयदेखि नेपाली सञ्चार क्षेत्रमा अनुभव सँगालेर खारिएका पत्रकारहरुको अनुभवलाई युवापुस्ताका सञ्चारकर्मीहको जुझारुपनले फरक–फरक कोणबाट समाचारहरुको तथ्यपरक विश्लेषण गर्ने, सही समाचारलाई उचित समयमा आम पाठकका बीचमा पस्कने प्रतिबद्धता व्यक्त गरे ।
थापाले भने, ‘स्वभाविक रुपमा क्यापिटल दैनिकको आगमन डिजिटल पत्रकारिताको युगमा खासै नौलो आयाम हुँदै होइन । अनि बिषयबस्तु र समसामयिकतामा प्रस्तुतीका दृष्टिकोणले पनि हामी अरु भन्दा भिन्न र फरक छौं भन्ने पनि होइन । तर बिषयबस्तु र सामग्रीलाई आदरणीय पाठकवर्गमा समक्ष पस्कने क्रममा हाम्रो जिम्मेवारी र विश्वसनीयताको पक्षमा भने हामी यथेष्ट सजग रहनेछौं । कतिपय बेला अपेक्षित रुपमा सामग्रीलाई प्रस्तुत गर्नेक्रममा केही अबेर अवश्य पनि हुन सक्दछ । तर तथ्यपरक समाचारको सही रुपमा पुष्टी नभइ हामी त्यस्ता सामग्रीलाई प्रकाशन गर्न हतारो गर्नेछैनौ ।’
कार्यक्रममा क्यापिल मिडिया ग्रुपमा नायव महाप्रबन्धकद्वय कृष्ण तिमल्सिना र उज्वल प्याकुरेलले क्यापिटल दैनिकमा थापा नेतृत्वको नयाँ सम्पादकीय समूहलाई शुभकामना व्यक्त गरे ।
क्यापिटल मिडिया ग्रुप अन्तर्गत हाल क्यापिटल एफ.एम, रेडियो सारङ्गी, क्यापिटल टेलिभिजन र क्यापिटल दैनिक सञ्चालित छन् ।
