फिल्म ‘बेस्ट फ्रेन्ड’ र ‘श्री’ चैत २७ मा प्रदर्शन हुने भएका हुन् । लप्पन छप्पन–२, मन सँग मन तथा कृष्ण लीलाले उक्त मितिबाट बाटो तताएपछि यी दुई फिल्मले स्थान पाएका हुन् । हल खुलेको छ तर दर्शकको न्यून उपस्थितिका कारण फिल्म प्रदर्शन रोकिएकोमा अब भने दुई फिल्मले हिम्मत गरेका छन् ।
एभरेस्ट सूर्य बोहोराको फिल्म ‘श्री’ टिमले ट्रेलर सार्वजनिक गर्दै प्रदर्शन मिति तय गरेको हो । फिल्म निर्माता सविता गुरुङ रहेकी छन् ।
फिल्ममा सन्दीप छेत्री, वर्षा सिवाकोटी, बुद्धि तामाङ, बसुन्धारा भुसाल, राजा राम पौडेल, रवीन्द्र झा, भोला सापकोटा, सविता गुरुङ, मोहन कृष्ण श्रेष्ठ लगायत कलाकारको अभिनय रहेको छ ।
यस्तै ,नयाँ वर्ष २०७८ को अवसर पारेर ‘गुड फ्रेन्ड’ फिल्म चैत २७ मै प्रदर्शन हुने भएको छ । साथी–साथीबीचको सम्बन्ध, प्रेम र समर्पणको कथामा निर्माण गरिएको फिल्मको ट्रेलर बुधवार सार्वजनिक गरिएको छ ।
यसअघि चैत २० मा हलमा आउने भनिए तापनि अब यो फिल्म चैत्र २७ मा दर्शकमाझ आउने पक्का भएको छ ।
राजबहादुर सानेको निर्देशनमा बनेको फिल्ममा मुकेश ढकाल, सबिना कार्की, राज सिंह, दीपक विक्रम शाही, एलवी कटुवाल, राजन महर्जन, वसन्त बर्मा, पूजा महर्जन, धिरज खत्री र भूमिका सापकोटा मुख्य भूमिकामा छन् ।
बिजी बर्मा फिल्म्सको ब्यानरमा वसन्त बर्माको प्रस्तुति रहेको फिल्मको निर्मातामा वसन्त बर्मा, राज सिंह र पम्फा बर्मा अनि सह निर्मातामा बारुफ बर्मा र पारुबी बर्मा छन् ।
