बलिउड अभिनेता सैफ अली खानमाथि केही हप्ता अघि भएको आक्रमणको घटनाले सबैलाई स्तब्ध बनाएको थियो। यस्तै परिस्थितिमा उनकी पत्नी तथा चर्चित अभिनेत्री करिना कपूरले सामाजिक सञ्जालमा एक गहन र रहस्यमय पोस्ट सेयर गरेकी छिन्। करिनाको यो पोस्टले विवाह, सम्बन्ध विच्छेद, बच्चा जन्माउने, आफन्तको मृत्यु र पालनपोषण जस्ता जीवनका संवेदनशील पक्षबारे गहिरो सन्देश दिएको छ।
करिनाले आफ्नो इन्स्टाग्राम स्टोरीमा लेखेकी थिइन्, "विवाह, सम्बन्ध विच्छेद, बच्चा जन्माउने, आफन्तको निधन र पालनपोषण भनेको के हो भनेर तपाईंले कहिल्यै बुझ्नु हुँदैन। जबसम्म यो तपाईंलाई पर्दैन। सिद्धान्तहरू र अनुमान गरिएका परिस्थितिहरू वास्तविकता होइनन्। जीवनले अन्यथा नभनेसम्म तपाईं आफूलाई एकदमै स्मार्ट ठान्नुहुन्छ।"
उनको यो सन्देश सामाजिक सञ्जालमा व्यापक रूपमा भाइरल भइरहेको छ। पोस्टलाई लिएर फ्यानहरूबीच चर्को बहस चलिरहेको छ। कतिपयले यो पोस्टलाई सामान्य जीवन दर्शनको रूपमा लिएका छन् भने केहीले सैफमाथि भएको आक्रमणसँग जोडेर व्याख्या गरेका छन्।
आक्रमणपछि सैफ अली खान आफ्नो नियमित काममा फर्किएका छन्। हालै मात्र उनी नेटफ्लिक्सको बहुप्रतीक्षित फिल्म ‘ज्वेल थिफ - द हेइस्ट बिगिन्स एट द नेक्स्ट’ को टिजर लन्च कार्यक्रममा देखिएका थिए। कार्यक्रममा सैफले सबैको अगाडि पुनः उभिन पाउँदा निकै खुसी लागेको बताए। "यो फिल्म मेरो लागि विशेष छ र म यसप्रति निकै उत्साहित छु," उनले भनेका थिए।
करिना कपूर पनि चाँडै नै फिल्म ‘दायरा’ मार्फत ठूलो पर्दामा फर्किदैछिन्। यो फिल्मलाई चर्चित निर्देशक मेघना गुलजारले निर्देशन गर्दैछिन्। ‘दायरा’ मा करिनाको साथमा बलिउडका बहुप्रशंसित अभिनेता आयुष्मान् खुराना पनि मुख्य भूमिकामा रहनेछन्।
यो फिल्मलाई सामाजिक मुद्दाहरूमा आधारित कथावस्तुसँग जोडिएको बताइएको छ। करिनाले यस फिल्ममा गम्भीर र चुनौतीपूर्ण भूमिका निर्वाह गर्ने चर्चा छ। फिल्मको छायाङ्कन केही महिनामा सुरु हुने तयारीमा रहेको छ।
सैफ र करिनालाई लिएर फ्यानहरूले विभिन्न प्रतिक्रिया दिइरहेका छन्। करिनाको रहस्यमय पोस्टले जीवनका कठिनाइहरू र व्यक्तिगत संघर्षप्रति एक प्रकारको गम्भीर दृष्टिकोण देखाएको कतिपय फ्यानले उल्लेख गरेका छन्। उता सैफको नयाँ फिल्मको टिजरले दर्शकहरूमा ठूलो उत्साह जगाएको छ।
सैफ र करिनाको यो व्यक्तिगत र व्यावसायिक यात्रा अहिले बलिउडमा चर्चाको विषय बनेको छ।
प्रकाशित मिति: सोमबार, माघ २८, २०८१ १५:२४
