काठमाडौं । नेपालले आगामी जुन जुलाईमा जिम्बावेमा खेल्ने एकदिवसीय विश्वकप छनोटमा पनि डिसिजन रिभ्यु सिस्टम (डीआरएस) नहुने भएको छ ।
अन्तर्राष्ट्रिय क्रिकेट परिषद् (आइसीसी) ले जिम्बावेमा हुने विश्वकप छनोटमा डीआरएस नहुने स्पष्ट पारेको छ । रिभ्यु हुँदा अम्पायरको गलत निर्णयको असरबाट टिम र खेलाडीलाई बच्न सक्छन् ।
बुधबार मात्रै नामिबियामा सम्पन्न आइसीसी विश्वकप क्वालिफायर प्लेअफमा अम्पायरको निर्णयलाई लिएर घरेलु टोलीका कप्तान ग्रहार्ड इरास्समले सामाजिक सञ्जालमै आलोचना गरेका थिए ।
२०१८ को विश्वकप छनोटमा पनि डीआरएस उपलब्ध थिएन । यस पटक विश्वकप छनोटका सबै खेलमा थर्ड अम्पायर भने उपलब्ध हुनेछन् । आगामी जुन १८ तारिखबाट सुरु हुने विश्वकप छनोटमा श्रीलंका, वेस्टइन्डिज, जिम्बावे, नेदरल्यान्ड्स, नेपाल, ओमान, स्कटल्यान्ड, युएई र अमेरिकाले स्थान पक्का गरेका छन् ।
श्रीलंका, वेस्टइन्डिज, जिम्बावे र नेदरल्यान्ड्स सुपर लिगबाट पुछारमा रहँदै विश्वकप छनोटमा पुगेका हुन् । यी चार टोलीले सोझै विश्वकप खेल्ने अवसर गुमाएका हुन् । अब सुपर लिगबाट आयरल्यान्ड र दक्षिण अफ्रिका मध्ये एक टोलीले विश्वकप छनोटमा आउनेछन् । आईसीसी विश्वकप लिग टू बाट स्कटल्यान्ड शीर्ष, ओमान दोस्रो र नेपाल तेस्रो स्थानमा रहँदै विश्वकप छनोटमा पुगेका थिए । छनोट प्लेअफबाट अमेरिका शीर्ष र युएई दोस्रो स्थानमा रहँदै विश्वकप छनोटमा पुगेका हुन् ।
विश्वकप छनोटमा सुपर लिगका पुछारका पाँच टोली, लिग टू का शीर्ष तीन र छनोट प्लेअफका शीर्ष दुई टोली गरि कुल १० टोलीले खेल्नेछन् । सुपर लिगमा रहेका आयोजक भारतसहित शीर्ष ७ टोलीले विश्वकपमा स्थान बनाएका छन् । अब दक्षिण अफ्रिका र आयरल्यान्ड मध्ये एक टोली सोझै विश्वकपमा पुग्दा एक टोलीले छनोट खेल्नु पर्ने हुन्छ । सुपर लिगमा नेदरल्यान्डसहित १२ टेस्ट राष्ट्र गरि १३,लिग टू मा ७ र विश्वकप छनोट प्लेअफमा ६ टोलीले प्रतिस्पर्धा गरेका थिए । सुपर लिगमा दक्षिण अफ्रिका २१ खेलमा ९ मा जित र १० मा हारसहित ९८ अंकका साथ आठौं स्थानमा छ । आयरल्यान्ड २१ खेलमा ६ मा जित र १३ मा हारसहित ६८ अंकका साथ ११ औं स्थानमा छ ।
आगामी मेमा आयरल्यान्डले बंगलादेशसँगको तीन खेलको एकदिवसीय अन्तराष्ट्रिय सिरिज खेल्दै छ । सो सिरिज क्लिनस्विप गरेमा आयरल्यान्डको ९८ अंक हुनेछ । समान अंक हुँदा दुवै टोलीको पहिला जित हेरिन्छ । दुवै टोलीको जित प्रतिशत पनि बराबर हुनेछ । त्यसपछि हेड टु हेड हेरिन्छ ।
