काठमाडौं । प्रतिनिधि सभाअन्तर्गतको अन्तर्राष्ट्रिय सम्बन्ध समितिले प्रधानमन्त्री शेरबहादुर देउवालाई आसन्न अमेरिका भ्रमणको एजेन्डाबारे जानकारी गराउन निर्देशन दिएको छ । आइतवार (आज) सिंहदरबारमा बसेको समितिको बैठकले भ्रमणको मिति तय भएपछि एजेन्डाबारे जानकारी गराउन निर्देशन दिएको हो ।
समितिले आजको बैठकमा प्रधानमन्त्री देउवालाई पनि छलफलका लागि बोलाएको थियो । तर, प्रधानमन्त्री देउवा बैठकमा उपस्थित भएनन् ।
बैठकमा प्रधानमन्त्री अनुपस्थित भएकोमा ध्यानाकर्षण भएको समितिका सभापति पवित्रादेवी निरौलाले बताए। उनले बैठकमा प्रधानमन्त्री देउवा नआएर संसदीय समितिलाई अपमान गरेको बताए ।
आजको बैठकमा प्रधानमन्त्री देउवाको अनुपस्थितिलाई लिएर विवादसमेत भएको छ । प्रमुख विपक्षी दल नेकपा एमाले र सत्तापक्षकै माओवादी सांसदले प्रधानमन्त्री देउवाको आलोचना गरेपछि कांग्रेसका सांसद भने बचाउमा उत्रिए ।
नेकपा एमालेका नेता भीम रावलले प्रतिनिधि सभाको अन्तर्राष्ट्रिय सम्बन्ध समितिमा प्रधानमन्त्री शेरबहादुर देउवाको अनुपस्थिति ‘खेदजनक’ भएको बताए । एसपीपीबारे प्रधानमन्त्री देउवाको जवाफ माग गरिएको तर, जवाफ दिन प्रधानमन्त्री अनुपस्थित हुनुले आशङ्का उब्जाएको उनको टिप्पणी छ ।
नेपाली कांग्रेसकी सचेतक पुष्पा भुसालले प्रधानमन्त्री देउवाको बचाउ गरे । उनले देउवाको अनुपस्थितिलाई संसदीय समितिको अपमान भन्न नमिल्ने बताए ।
भुसालले समितिले बोलाउँदा अनुपस्थित भएको विषयलाई समितिकै अपमानका रूपमा नलिन आग्रहसमेत गरे ।रक्षामन्त्रीसमेत रहनुभएका प्रधानमन्त्री देउवालाई अमेरिकासँगको स्टेट पार्टनरशिप प्रोग्राम (एसपीपी), परराष्ट्र नीति कार्यान्वयन, अमेरिका भ्रमणबारे जानकारी दिन बोलाइएको थियो ।
गएको शुक्रवार समितिले नेपाली सेना र रक्षा मन्त्रालयलाई एसपीपीसम्बन्धी सम्पूर्ण कागजात बुझाउन निर्देशन दिएको थियो ।
