काठमाडौं । सरकारले आजबाट लागु हुने गरी लकडाउन कडा गर्ने भएको छ । कोरोना भाइरसको संक्रमण बढेपछि लकडाउनमा कडाई गरिने भएको हो । संक्रमण समुदायसम्म फैलिएपछि गृह मन्त्रालय कडा रुपमा प्रस्तुत भएको छ । प्रधानमन्त्री केपी शर्मा ओलीले पनि लकडाउन कडा गर्ने निर्देशन दिनुभएकाले लकडाउनलाई कडा पारिएको गृह मन्त्रालयले जनाएको छ ।
संक्रमणलाई दृष्टिगत गरी जेठभर पनि लकडाउन लम्बनसक्ने र यसका लागि पूर्व तयारी भइसकेको स्रोतले जनाएको छ । गृह मन्त्रालयले सुचना नै जारी गरेर आजबाट यसअघि वितरित सबै पास रद्द गरेको छ । अब पुरानो पास लिएर चल्ने सबैलाई कारबाही गरिनेछ । आजबाट एक जिल्लाबाट अर्को जिल्लामा जान रोक लगाइएको छ । जानै परे सम्बन्धित जिल्लाहरुका प्रमुख जिल्ला अधिकारीबाट अनुमति लिनुपर्नेछ । काठमाडौं उपत्यकाको हकमा भने एकै जिल्लाको मान्यता रहने जनाएको छ ।
अत्यावश्यक सेवाका सवारीलाई भने पास नभएपनि हुने तर, ती सवारीमा यात्रा गर्ने सबैले अनिवार्य आधिकारिक परिचयपत्र लिनुपर्नेछ । पास विना सञ्चालन गर्न पाउने सवारीसाधन एम्बुलेन्स, शवबाहन र दमकल रहने उल्लेख गरिएको छ ।
यसैगरी झण्डावाल सवारी, कुटनीतिक उन्मुक्ति तथा सुविधा प्राप्त नियोग, व्यक्ति तथा संघ संस्थाहरु प्रेस काउन्सिलबाट जारी भएको प्रेस पास प्राप्त सञ्चारकर्मीहरु,स्वास्थ्य सेवामा खटिएका चिकित्सक, नर्स, फार्मा्सिस्ट प्रयोगशालामा कार्यरत प्राविधिक, अस्पतालमा कार्यरत अन्य कर्मचारीहरु, औषधी उत्पादन ढुवानी र विक्री वितरणमा संलग्न हुने जनशक्तिहरु अत्यावश्यक वस्तु तथा ढुवानी गर्ने मालबाहक सवारी साधनहरु र यी क्षेत्रका सवारी चलाउनेले अनिवार्य आफ्नो कर्मचारी परिचय पत्र साथमा लिएको हुनुपर्ने जनाइएको छ ।
यी बाहेकका सवारी साधनले अत्यावश्यक र आकस्मिक अवस्था हेरेर निश्चित समयका लागि पास पाउनेछन् । पास लिनसक्ने व्यवस्था पनि गरिएको छ ।
