काठमाडौं । नेपाली काँग्रेसको १४ औँ महाधिवेशन अन्तर्गत पाँच बाकी सहमहामन्त्रीको मत गणना सुरु भएको छ । मत गणना पार्टी कार्यालय सानेपामा शुक्रबार विहान ११ बजेपछि मत गणना सुरु भएको हो ।
खस–आर्य, मधेसी, मुस्लिम, थारु र पिछडिएको क्षेत्रको तर्फका सहमहामन्त्रीको मत गणना भइरहेको काँग्रेस निर्वाचन समिति सदस्य तेजबहादुर रावलले जानकारी दिए । पाँच सहमहामन्त्रीको मतगणना पाँच ठाउँमा भइरहेको उनको भनाइ छ ।
खस आर्य सहमहामन्त्रीमा शेरबहादुर देउवा समूहबाट किशोरसिंह राठौर र शेखर कोइराला समूहबाट देवराज चालिसे उम्मेदवार छन् । यस्तै थारु कलस्टरमा देउवा समूहबाट उमाकान्त चौधरी र कोइराला समूहबाट तेजुलाल चौधरी उम्मेदवार छन् ।
मुस्लिम कलस्टरको सहमहामन्त्रीमा देउवा पक्षबाट फरमुल्लाह मन्सुर र कोइराला समूहबाट शेख वकिल उम्मेदवार छन् । पिछडिएको क्षेत्र कलस्टरको सहमहामन्त्रीमा देउवा समूहबाट जीवनबहादुर शाही, कोइराला समूहबाट बद्री पाण्डे र निधि समूहबाट चेतराज बराल उम्मेदवार छन् ।
काँग्रेसमा क्लस्टर अनुसार ८ सहमहामन्त्री निर्वाचित हुँदैछन् । महिला, दलित र आदिवासी जनजातितर्फका सहमहामन्त्रीको मतगण्ना बिहीबार सम्पन्न भएको थियो ।
महिला सहमहामन्त्रीमा महालक्ष्मी उपाध्याय ‘डिना’, आदिवासी जनजाति सहमहामन्त्रीमा भिष्मराज आङ्देम्बे र दलित सहमहामन्त्रीमा जीवन परियार निर्वाचित भएका छन् । महाधिवेशनबाट अहिलेसम्म काँग्रेसका ८ जना पदाधिकारी निर्वाािचत भइसकेका छन् ।
सभापतिमा शेरबहादुर देउवा दोहोरिएका छन् भने उपसभापतिमा पूर्णबहादुर खड्का, धनराज गुरुङ निर्वाचित भएका छन् । यस्तै महामन्त्रीमा गगन थापा र विश्वप्रकाश शर्मा विजयी भएका छन् ।
काँग्रेसमा १३ जना पदाधिकारी निर्वाचनबाट आउँदैछन् भने १२१ जना केन्द्रीय सदस्य पनि निर्वाचनबाट आउनेछन् । केन्द्रीय सदस्यको मतगणना भने पदाधिकारीको सकेर मात्र सुरु हुने निर्वाचन समितिले जनाएको छ ।
