भारतमा दक्षिणी शहर हैदराबादमा एकजना २७ वर्षीया महिला पशुचिकित्सकको बलात्कार र हत्या भएको ठानिएपछि त्यसले उब्जाएको आक्रोश झन् झन् चर्किरहेको छ।
बुधवार साँझ स्थानीय समय ६ बजेतिर ती महिला आफ्नो स्कूटरमा डाक्टरकहाँ जाने भन्दै घरबाट निस्किएकी थिइन्।
पछि उनले आफ्नो स्कूटर पन्चट भएको, र एक ट्रक ड्राइभर मद्दत गर्न अघि सरेको जानकारी परिवारलाई फोनबाट दिएकी थिइन्। उनले आफू कुनै टल प्लाजा-सडकमा आवागमनका लागि पैसा तिर्ने ठाउँ-मा पर्खिरहेको बताएकी थिइन्।
त्यसको केही समयपछि उनलाई फोनमा सम्पर्क गर्ने प्रयास विफल भए।
बिहीवार बिहान उनको मृत शरीर सडकको 'फ्लाइओभरु मुन्तिर एक दूध व्यापारीले भेटेका थिए।'
भारतको कानुनबमोजिम मृत्युपश्चात् पनि बलात्कारको पीडितको नाम खुलाउन पाइँदैन। तर शुक्रवार ती महिलाको नाम ट्विटर ट्रेन्डमा थियो जब दशौँ हजार मानिसले आक्रोशपूर्ण ट्वीट गर्दै न्यायको माग गरे।
सन् २०१२ को डिसेम्बरमा राजधानी दिल्लीमा एक महिलाको बसभित्र सामूहिक बलात्कार र हत्या भएयता भारतमा महिलाविरुद्धका यौन हिंसा चर्चाको केन्द्रमा रहँदै आएका छन्। तर त्यस्ता हिंसाका घटना कम भएका सङ्केत देखा परेका छैनन्।
अपराधबारे पछिल्ला सरकारी आँकडामा सन् २०१७ मा भारतभर प्रहरीले ३३,६५८ बलात्कारको घटना- अर्थात् प्रतिदिन ९२-रेकर्ड गरिएको उल्लेख छ।
शहरको एक प्रहरी चौकी सामु हजारौँ मानिसले प्रदर्शन गर्दै जवाफदेहीताको माग गरे।
प्रहरीले तीन अधिकारीहरूलाई निलम्बन गरेको छ ।
ती महिलाको परिवारका सदस्यले भेट्न आएका राजनीतिज्ञ एवं प्रहरी अधिकारीलाई फर्काइदिएका छन्। उनीहरूले छिटो कारबाहीको माग गरेका छन्।
विभिन्न चर्चित घटनामा जनआक्रोश व्यापक देखिएपनि भारतमा महिलाविरुद्ध बलात्कार एवं अन्य हिंसा उच्च स्तरमा रहेको बताइन्छ।
बुधवार कामबाट फर्कने क्रममा हराएकी ती महिलाको जलेको शरीर भेटिएको थियो।
प्रहरीले उनको हत्या अगाडि सामूहिक बलात्कार भएको बताएको छ।
घटनाको सन्दर्भमा चार पुरुषलाई पक्राउ गरिएको छ।
तीमध्ये दुई पुरुषका आमाले ती दोषी पाइए सजाय दिलाउन आह्वान गरेका छन्।
'तिनलाई जस्तोसुकै सजाय दिए हुन्छ। मेरो पनि छोरी छ,' एकजना आमाले समाचार संस्था प्रेस ट्रस्ट अफ इण्डिया (पीटिआइ)लाई बताइन्।
प्रहरी चौकीबाहिर हजारौँ मानिसले प्रदशन गर्दै दोषीलाई मृत्युदण्डको माग गरेका छन् ।
हैदराबाद घटनालाई लिएर शनिवार दिल्लीमा प्रदर्शन भएको छ।
देशका अन्य भागमा पनि विरोध प्रदर्शन तथा पीडितको निम्ति प्रार्थना गरिएका छन्। भारतीय कानुनबमोजिम ती महिलाको नाम खुलाउन पाइँदैन।
’
बिबिसी
